Ikang Mahal Paskali
Pagi-pagi lai, Caca Aga su pulang dari pasar. Seng pake lama lai, dia capat-capat mainkan (kasi barsi, Red) akang di jiku dapor. Bu Maku pagi itu, ada fluit-fluit sandiri di tampa bajumur pakeang yang baku sabla deng Caca Aga dong pung dapor...
Caca Aga : "Heeh!! Ikang pung mahal saja eee.. Lama-lama, loko katong pi mangael ikang. Abang Hasan, tolong ambe loyang sedang di rak-rak dalang do."
Seng lama lai, Abang Hasan su datang bawa loyang tu, for Caca Aga. Bu Maku yang dapa dengar Caca Aga pung suara, langsung nai mangente di atas tembok..
Bu Maku : "Ehm, ehm.. Rajin eee?? Mar itu ada bamulu apa lai? Kayanya, sabang hari mulu tar perna tado ka."
Caca Aga : "Biasa, ibu-ibu. Seng usa herang katong pung mulu lai. Katong ni memang di ciptakan for bagitu suda. Dar pada kamorang, laki-laki. Apapa cuma mau tarima barsi sa. Jadi, kalo katong bamulu tu, itu suda.."
Bu Maku : "Aga, Aga.. Mangkali lahir, mulu ka muka kapa ee?? He he he.."
Caca Aga : "Mar memang ee.. Ikang sakarang ada mahal.."
Bu Maku : "Yah, mau biking bagemana lai. Pengaru cuaca ni."
Caca Aga : "Io eee.. Ikang momar sa, pung mahal saja eee.. Yang sedang sa, lima ekor for Rp 10 ribu. Padahal biasa cuma Rp 5.000. Cakalang asar yang sedang jua, saekor Rp 25 ribu. Akang nai Rp 10 ribu."
Bu Maku : "Kalo macang beta ni, seng talalu repot. Makang sayor saja, ka ganti ikang deng korned jua mantap. Labe par labe, bla deng tempe ka tahu saja."
Caca Aga : "Itu ale. Mar katong di ruma? Abang Hasan deng anana tu, bisa gila, kalo sahari seng makang ikan."
Bu Maku : "Yaah.. Paleng kalo cuaca su bagus, samua su bisa normal. Kan jua, akang pung harga seng nai sampe labe batas tooo?"
Caca Aga : "Iooo.. Sayor-sayor jua, macang kantang, kol deng wortel jua normal sa. Kar'na itu tu, datang dar luar."
Bu Maku : "Intinya to, tau bersyukur sa for Yang Di Atas. Katong masi tetap barasa cukup kalo urusan makang-minong sampe oras ni. Masi ada orang laeng susa, seng macang deng katong bagitu."
Caca Aga : "Io eee??"
Bu Maku : "Jadi, kalo ada pung labe, jang lupa bage for yang laeng lai. Ingatang, hidop deng tetangga."
Caca Aga : "Maksudnya apa?"
Bu Maku : "He he he.. Jang pura-pura bego lai. Ada sodara dar Seri sana ada kasi ikang tuuu? Mari bage akang ka sini. Jang tinggal kong deng hidop busok tu! Piara kalakuang kaya bagitu tu, kurang bagus, kawan!"
Caca Aga : "Mar su talalu lai.. Datang suda, la mari ambe."
Bu Maku : "He he he.. Bagitu kaaa.."
Caca Aga : "Galojo!!Pastiu deng os. Bawa loyang skali dar ruma. Jang suka bapinjam katong pung barang-barang."
Bu Maku : "Itu bole, baru nama Caca Aga.."
Bu Maku langsung turung dar tembok, la siap-siap ambe loyang for pi ambe ikang gratis di Caca Aga sabla. (Usi Ece)
Fri May 01, 2009 11:47 am